Indranatha Thenuwara ලොකු අයියේ....

මේ සටහන December 22, 2014 දින Indranatha Thenuwara මහතාගේ මුහුණු පොතේ ඔහු විසින් පළ කළ පෝස්ටුවක් පිළිබඳවය.

එය දුටු සැනින් මා මෙලෙස ප්‍රතිචාර දැක්වූවා.

මෙය මාව විශ්මයට පත්කළ පින්තූරයක් වුණා. පින්තූරය විතරක් නොවේ ඒ සමග ලියා තිබුණු සටහනත්. තව වසර ගණනකටවත් ඔබ වැනි ප්‍රවීනයෙක් මගේ පින්තූරයක් ඇඳ මෙවන් විශ්මයකට මා පත්කරතැයි මා සිතුවේ නෑ. හැමදාම ඔබේ නිර්මාණ රසවින්දා සහ ඒවාගෙන් යමක් ගන්න උත්සාහ කළා මිස.... මට හරි බරක් දැනුනා. ඒ සමගම බයකුත්. ඔබ වැන්නෙකුගෙන් මෙවැනි ඇගයීමක් ලැබුණාම මම පරෙස්සම් විය යුතුයි ඊට සුදුසු ලෙස හැසිරෙන්න. ස්තුතියි කීම දුප්පත්වැඩි නිසායි පින් කියා කීවේ. මේ ලෙන්ගතු කම හරිම උණුසුම්.

- යසනාත් -

පසුව ලියමි:

මල්ලී.. ඉන්ද්‍රනාථ අයියා කතා කරන්නේ. ඔයාගේ මේල් ඇඩ්‍රස් එක ටෙක්ස්ට් කරන්න. ඊට යමක් එවනවා. එය බලා මට කතා කරන්න.... යැයි අද උදේ කීවාම මම නිකමටවත් හිතුවේ නෑ ඒ මෙවැනි දේකට කියා. එය බැලූ ගමන්ම කතාකිරීම අපහසු නිසා මෙසේ ලියා පසුව කතා කරන්න හිතුවා.

මේ මුහුණු පොතේ එම පින්තූරයට සහ අදහස් වලට පිවිසුම.

https://www.facebook.com/photo.php?fbid=721183761323187&set=a.108901999218036.15324.100002947105775&type=1&theater

අවුරුදු ගණනාවක ම සිට, කොළඹ පැවැත්වෙන ගීත සංයුක්ත තැටි එළි දැක්වෙන උත්සව කිහිපයකදී ම මම ඔහු දැක ඇත්තේ වුව ද, අප අතර, ලොකු දැන හැඳුනුම් කමක් තිබුනේ නැත.

ඊටත් පසු කාලයක මා ඔහු වඩා සමීප ව ඇසුරු කරන්නට පටන් ගත්තේ මූණු පොත හරහා ය. එද ගීත ලියන දොස්තර මහතා ලෙසින් නොවේ.

ඡායාරූප ශිල්පය සහ කලාව ගැන ඇතිවන සංවාදවලට නිතර අදහස් දක්වන, වනජීවී සහ ස්වභාව ධර්ම ඡායාරූපකරණයට ඇලුම් දක්වන ඡායාරූප ශිල්පී රසවතකු ලෙසිනි.

තඹුත්තේගම රෝහලේ ප්‍රධාන වෛද්‍ය නිලධාරී ලෙසින් අතිශය කාර්ය බහුල සේවයක යෙදෙද්දීත්, ඉඩක් ලැබෙන සුලු මොහොතක වුව ඡායාරූපමය සංවාදයන්හි යෙදෙන්නට, අදහස් දක්වන්නට ඉදිරිපත් වෙයි. ඊටත් වඩා ඔහු සිය බ්ලොගය මගින් තමන්ගේ ම ගේය පද රචනාවන් උලුප්පා දක්වනවාට වඩා බොහෝ සෙයින් ඔබ්බට ගොස්, අප සිත්හි නොමැකෙන සටහන් තබා ඇති වෙනත් ගේය පද රචකයින්ගේ ගී පද ගැන හෘදසංවාදී කතිකාවතකට අප කැඳවාගෙන යයි. එවන් ගරු කටයුතු මෙහෙවරක යෙදෙන මේ මගේ සහෝදරයාට මගේ හද පිරි භක්තිය ප්‍රකට කරනුවස් මේ කටු සටහන පූජා කර සිටිමි.

ඉඩක් ලද විටෙක ඔහුගේ සිතිවිලි එක්තැන් කොට ඇති මේ රස බ්ලොග් අඩවියට ද එබී බලන මෙන් ඔබෙන් ඉල්ලමි.

http://yasanathsithuwili.blogspot.com/

- Indranatha Thenuwara  -

උපුටා පළ කිරීම - යසනාත් ධම්මික බණ්ඩාර -